FDA आयुक्त तुकाराम मुंढे यांनी उपमुख्यमंत्री सुनेत्रावहिनी अजितदादा पवार यांची सदिच्छा भेट घेतली. या भेटीदरम्यान विविध विषयांसह सुरू असलेल्या कामकाजाचा सविस्तर आढावा घेण्यात आला. नागरिकांच्या आरोग्याशी आणि सुरक्षिततेशी संबंधित महत्त्वाच्या बाबींवरही यावेळी चर्चा झाली. 

विशेषतः औषधे, सौंदर्यप्रसाधने तसेच विविध ग्राहक वस्तूंची विक्री करणाऱ्या आस्थापनांमध्ये कालबाह्य उत्पादने विक्रीसाठी ठेवली जात नाहीत ना, याची खात्री करण्यासाठी प्रभावी तपासणी मोहीम राबवण्याचे निर्देश देण्यात आले.

बाजारपेठेत कालबाह्य किंवा नियमांचे उल्लंघन करणारी उत्पादने उपलब्ध राहिल्यास त्याचा थेट परिणाम ग्राहकांच्या आरोग्यावर होऊ शकतो. त्यामुळे संबंधित विभागांनी अधिक सतर्क राहून नियमित तपासणी करावी आणि नियमांचे उल्लंघन आढळल्यास आवश्यक ती कार्यवाही करावी, अशा सूचना देण्यात आल्या.

औषधे आणि सौंदर्यप्रसाधनांच्या बाबतीत बनावट किंवा नियमबाह्य उत्पादनांविरोधात FDAकडून यापूर्वीही कारवाई करण्यात आली आहे. त्यामुळे नागरिकांना सुरक्षित आणि दर्जेदार उत्पादने मिळावीत यासाठी तपासणी आणि अंमलबजावणी अधिक प्रभावी करण्यावर भर दिला जात आहे. 

नागरिकांचं आरोग्य आणि सुरक्षितता ही शासनाची सर्वोच्च प्राथमिकता आहे, या भूमिकेतून संबंधित यंत्रणांनी काम करावे, असे यावेळी स्पष्ट करण्यात आले.

या भेटीनंतर औषधे, सौंदर्यप्रसाधने आणि ग्राहक वस्तूंच्या विक्रीतील नियमपालनावर प्रशासनाची नजर अधिक कडक होण्याची शक्यता आहे.