मुंबई विद्यापीठाने संलग्न महाविद्यालयांतील प्रलंबित पात्रता प्रक्रियेबाबत महत्त्वाचे निर्देश जारी केले आहेत. महाराष्ट्र राज्य माध्यमिक व उच्च माध्यमिक शिक्षण मंडळाव्यतिरिक्त इतर बोर्डातून बारावीची परीक्षा उत्तीर्ण होऊन शैक्षणिक वर्ष २०२४-२५ मध्ये पदवी अभ्यासक्रमांना प्रवेश घेतलेल्या विद्यार्थ्यांची पात्रता प्रक्रिया अद्याप पूर्ण झालेली नाही. ही प्रक्रिया ३७० हून अधिक महाविद्यालयांमध्ये प्रलंबित असल्याचे विद्यापीठाने स्पष्ट केले आहे.
उपलब्ध माहितीनुसार, पात्रता प्रक्रिया प्रलंबित असलेल्या विद्यार्थ्यांची संख्या सुमारे ३,०१४ आहे. या विद्यार्थ्यांची महाविद्यालयनिहाय यादी विद्यापीठाने उपलब्ध करून दिली आहे. संबंधित महाविद्यालयांना प्रलंबित विद्यार्थ्यांची माहिती आणि आवश्यक तपशीलही कळविण्यात आले आहेत.
विद्यापीठाने संबंधित महाविद्यालयांना विद्यार्थ्यांची कागदपत्रे तातडीने तपासून आवश्यक कागदपत्रे प्रवेश, नाव नोंदणी, पात्रता व स्थलांतर प्रमाणपत्र विभागाकडे सादर करण्याचे निर्देश दिले आहेत. विद्यार्थ्यांची पात्रता प्रक्रिया पूर्ण करण्यासाठी महाविद्यालयांनी आवश्यक कार्यवाही लवकरात लवकर करावी, असे विद्यापीठाने स्पष्ट केले आहे.
विशेष म्हणजे, पात्रता प्रक्रिया पूर्ण न झाल्यामुळे संबंधित विद्यार्थ्यांचे निकाल ‘RPV’ स्थितीत राहिल्यास त्याची जबाबदारी संबंधित महाविद्यालयाची राहणार असल्याचे विद्यापीठाने स्पष्ट केले आहे. त्यामुळे विद्यार्थ्यांच्या शैक्षणिक हिताचा विचार करून प्रलंबित प्रक्रिया पूर्ण करण्यास विलंब करू नये, असे निर्देश देण्यात आले आहेत.
इतर राज्य मंडळे किंवा केंद्रीय मंडळांतून बारावी उत्तीर्ण झालेल्या विद्यार्थ्यांच्या प्रवेशावेळी काही कागदपत्रे आणि पात्रतेची स्वतंत्र पडताळणी आवश्यक असते. त्यामुळे संबंधित विद्यार्थ्यांनी आपल्या महाविद्यालयाशी संपर्क साधून पात्रता प्रक्रियेची सद्यस्थिती तपासणे आणि आवश्यक कागदपत्रे प्रलंबित असल्यास ती तातडीने जमा करणे महत्त्वाचे आहे.
मुंबई विद्यापीठाने महाविद्यालये आणि विद्यार्थ्यांना उपलब्ध असलेली महाविद्यालयनिहाय यादी तपासण्याचे आवाहन केले आहे. पात्रता प्रक्रिया वेळेत पूर्ण झाल्यास विद्यार्थ्यांच्या निकालाशी संबंधित अडचणी टाळता येऊ शकतात.
