पुणे विमानतळ परिसरात वाढत्या वाहनांच्या गर्दीमुळे निर्माण होणाऱ्या वाहतूक कोंडीवर नियंत्रण मिळवण्यासाठी विमानतळ प्रशासनाने महत्त्वाचा निर्णय घेतला आहे. विमानतळाच्या आगमन आणि प्रस्थान विभागाबाहेर वाहनांची अनावश्यक रांग लागून वाहतुकीवर परिणाम होत असल्याने आता वाहनांसाठी वेळेची मर्यादा निश्चित करण्यात आली आहे.
नवीन नियमांनुसार, विमानतळ परिसरात प्रवेश केलेल्या वाहनांना १५ मिनिटांच्या आत बाहेर पडणे आवश्यक राहणार आहे. या कालावधीपेक्षा अधिक वेळ वाहन थांबविल्यास ५०० रुपयांचा दंड आकारला जाणार आहे. या निर्णयाची अंमलबजावणी लवकरच कडकपणे करण्यात येणार असल्याची माहिती प्रशासनाकडून देण्यात आली आहे.
प्रवाशांना घेण्यासाठी किंवा सोडण्यासाठी येणाऱ्या वाहनांमुळे विमानतळाबाहेर अनेकदा वाहतुकीचा ताण निर्माण होतो. विशेषतः गर्दीच्या वेळेत या समस्येची तीव्रता वाढत असल्याने प्रशासनाने हा निर्णय घेतल्याचे सांगितले जात आहे.
वाहनचालकांनी दीर्घकाळ थांबण्याऐवजी अधिकृत पार्किंग सुविधेचा वापर करावा, असे आवाहन करण्यात आले आहे. या नव्या नियमामुळे विमानतळ परिसरातील वाहतूक अधिक गतिमान होईल आणि प्रवाशांनाही दिलासा मिळेल, अशी अपेक्षा व्यक्त केली जात आहे.
पुणे विमानतळावरील वाढती प्रवासी संख्या लक्षात घेता भविष्यात वाहतूक व्यवस्थापनासाठी आणखी काही उपाययोजना राबविण्यात येण्याची शक्यता आहे
